Pawltlak Thla ni 8, 2012... Issue 49

Page-1

Tualchhung :

Nau nei thar : Pu Lallungmuana te nupa Buala Sec. a mite chuan Dec. ni 6, 2012 khan Durtlang Hospital-ah fanu duhawm tak an nei thar.

Tuak thar : Lalengmawia S/o Lalchhawna, Buala Sec. leh C.Zonunhlimi Republic Veng te chuan Dec. ni 6, 2012 (Ningani) khan Hlimen Presby. kohhran Biak Inah dam chhunga nupa ni turin ‘tiam tlat e’ an ti.

IKK Gen. Assembly : Dec. ni 6-9,2012 hmangin Isua Krista Kohhran chuan General Assembly(Khawmpui lian) Reiekah an nei a, kan veng a\ang pawhin engemawzat an kal a ni.

Lawmman la : Nl. Lalrinkimi D/o R.Deng\huama, Lalsavunga Sec. chuan Mizo Academy Of Letter (MAL) in Drama Centenary denchhen a Drama Writing Competition a buatsaihah lawmman pakhatna a la. He lawmman hian ` 15,000 leh thuziak Citation a keng tel.

Mi harsa \anpui dawn : Kumin Krismas denchhena Branch YMA in vengchhunga miharsa te \anpui nan ` 10,000/- a sem  dawn. Miharsa chhungkaw 5 hnenah ` 2,000 \heuha sem tum a ni.

Charity bâwm dawh : Kan veng a Facebook Group pakhat Hlimkhawpui Lovers te chuan kumin Christmas denchhen a miharsa zawk te \anpui nan Nl. Zuitluangi Dawr kawtah Charity bawm an dawh a. A bikin Hlimkhawpui lovers Member te chu tlemlua emaw tam lua awm lova thlak ngei turin an inngen a. Tin, midang, mite \anpui duhna thinglung pu zawng zawngte pawhin remchan ang zat zat a thlak theih reng bawk a ni. Dec. ni 15 thleng bawm hi dawh a ni ang.

Kawng siam\ha : Dec. ni 3, 2012 khan Local Council leh PWD \angkawp ten Quarry kawng chhe lai leh bumboh lai JCB hmangin an thianfai a. Local Council leh PWD chungah mipuite an lawm hle.

Front :

2013 HRUAITU TUR THLANG DAWN

     Young Mizo Association Hlimen Branch Committee in a lo rel tawh angin kumthar 2013 a YMA Hlimen Branch hruaitu tur chu December ni 14, 2012 zanah neih tur a ni a, a hmun atan YMA Hall a ni ang.
    YMA hruaitu thlan dan tur hi Nominate te a\ang hian hruaitu atana kan mi duh mi 6 thlanchhuah tur a ni a, chuta thlan tlin mi 6 te chuan an chanvo tur R.O hovin an siamfel leh dawn a ni.
    Member ten hruaitu thlan hi kan ngaihpawimawh \heuh a \ul. Kan khawtlang hi a nawm leh nawm lohte, a \han leh \han lohte hi Member te kutah a innghat thui hle. Kan hruaitu tur thlanchhuah ten an zir leh zir lohah a innghat lo tih tunge sawi thei? Chuvangin Member ten kum 2013 a YMA Branch hruaitu tur hi ngaipawimawhin mi\ha leh fel hruaitu kan neih nan rilru fim taka ngaihtuah chungin 2013 Branch hruaitu hi thlanchhuah tur a ni e. Heng mite hi kumthar 2013 Branch YMA hruaitu thlan buaipuitu turte an ni :-

R.O :    Pu Pakunga  Adviser
P.O :    Pu Duhthusama, Adviser.  
           Pu R. Lalngheta,  Tresurer CYMA.
           Pu Lalhmingliana, Chairman Local Council.
           Pi Biak\huami, President MHIP.
          Pu C. Zothanliana, Vawmphunga Section
          Pu Zonuntluanga, Saichhuma Section.
          Pu C. Lalengzauva, Damvea Section.
          Pu Lalengliana, Buala Section.
         Pu H. Lawmzuala, Saichhuma Section te an ni.

Nominate :
    1.    F.Laltlanmawia          2.    F.Zosangzuala
    3.    K.Lalchhuanawma    4.    Lalchhankima
    5.    Lalchhantluanga        6.    Lalhmuchhuaka
    7.    Lalhmunsiama           8.    Lalkhawmawia
    9.    Lallawmkimi            10.    Lalrinchhana                

   11.   Lalrinmawia            12.    Lalroliani                

    13.   Lalthantluanga        14.    Lalthlengliana
    15.   Lalvulliana              16.    N.Zoliansanga  
    17.   R.Lalawmpuia        18.    R.Lalbiakmawia           

    19.    R.Lalremsanga      20.    R.Lalrindika                

    21.    R.Lal\anpuia        22.    Robuanga                

    23.    R.Zoliana             24.    Vanlalauva               

    25.    Vanlalliana           26.    Vanlaltluanga                

    27.    Zairemmawii      28.    Zairemthanga                 

    29.    Zochuanpuii       30.    Zolianchhunga            

    31.    Zoramhmangaiha
    Floor Nomination 3 an awm thei ang.

Page-2

Editorial :

ENGTIN NGE KRISMAS I HMAN DAWN

    Kan hunpui zinga hlu ber mai Krismas chu kan hma lawkah a lo inchhawp reng ta mai le,  he hunpui hi khawvel ram hrang hrang pawhin an hlutin an ngaipawimawh hle a.  Mahse hmuah dan leh hman duhdan erawh a inang lo tlang hle.
    Keini Mizo zingah pawh kan hman duhdan leh hmuah dan chu a in persan leh tlang hle in a rinawm.
    Pathian thua kan hmuh ang chuan  Isaia 9:6-ah hetiang hian kan hmu, “Kan tan naupang a lo pianga,  fapa pekin kan awm ta.” a ti a. A ni chu kan tan chatuan Pa anih thu min hrilh; chu naupang Isua lo piang hmuak a, chibai buktute chanchin, mize inanglo chi hnih, Matt. 2:1-16 ah kan hmu leh bawk a. Tin, ziak dangah beramputen chibai an buk dan leh  hlim tak leh lawm  taka an awm thu kan hmu bawk. Mifingte leh beramputen an hmuah a, chibai an buk nan thilpek an neih rohlu an pe a, hlimtakin an awm thu kan hmu bawk.
    Tin, chibai buk tu dang leh chu Lal Heroda a ni. Lal a ni a, amah aia Lal an lo chhuak tur chu itsikna leh huphurhna avangin ramchhunga sipai \ha leh ralthuam \ha hmangin nausen mipa fa a suattir a, lunsun chhhungkua a thlen nasa hle ang tih Bible a\angin kan hre thei awm e. Nang leh kei hian he hunpui hi engtin nge kan hman ve dawn, mifingte leh Berampute angin kan neih ro thilte hlan a, chibai bukin hlim takin kan awm dawn nge, Lal Heroda ang maiin nu leh pa, khawtlang tan lungngaihna leh \ahna thlen zawng in he hunpui Krismas hi kan hmang dawn?
    Engtin nge Krismas i hman dawn?

Ziaktute huang :
   
ENG MASI NGE I HMAN DAWN

- Robuanga
  
    Krismas lawmna hun leh ni a lo hnai leh ta, a hming han lam mai pawhin rilru ngaihtuahna te chu a phur hian aphur surh a ni ber mai. Mahse, Krismas awmzia tak tak hre lo hi kan ramah tam fe chu sawi tur kan hre \heuh awm e.
    Pathian thu zir mi mithiam ho ten an sawi dan leh Bible a\anga kan lo hmuh/chhiar \hin angin Krismas awmzia chu khawvel sual a tlu, chhanchhuah a nih leh na tura Pathianin a fapa Isua khawvel tana a pek, khawvel a mihring a a lo pianna, kan lawmna hun leh nî hi a ni.  Chu hun leh ni chu khawvel a kohhran hote chuan Pathian fak leh chawimawina hun atan hman a ni thin. Krismas an hrilhfiahna kawng khat leh chu hetiang hi a ni. (Kris - Isua Krista (Mas - ruai) tiin. Chuti a nih chuan Krismas tih chu Krista ruai tihna a lo nih tak chu.
    Kum engzat nge i nih? I kum zat chiah kha Krismas i hman tawh zatah chhut la, i hmang dik em tih erawh chu nangman i hriat kha. Krista tel lova Mas chauh hmang \hin kum 70 mi i nih chuan Krismas i la hmang lo tihna a ni. Mas chu ruai tihna a lo nih chuan i hun kal tawh a i hman dan thlir kir la eng Mas nge i hman? Thuhriltu pakhat chuan \hangthar zingah Krismas hmang lova vawk mas te, bawng mas te, ar mas te, ruihhlo mas hmangte an pung tual tual tiin a sawi a. Kum 2012 Krismas lo thleng turah hian i inbuatsaih dan leh hman i tum dante kan insawisak thei lo.
    Vawksa mas(ruai), Bawngsa Mas(ruai) Broiler mas (ruai), ruihhlo mas(ruai) etc.. nge Krismas dik tak le..
    Thuhriltu pakhat chuan “kum 70 mi ka ni tawh a, Krismas hi vawi 70 lai ka lo hmang ve tawh tiin ka insawi \hin. Mahse kum 60 ka nih a piangthar ka nih avangin Krismas chu kum 70 mi niin vawi 10 chauh ka la hmang a ni tih ka inhre chiang ta” a ti a. Nang kum engzat nge i nih?Krismas hi i lo hmang fo nge? Vawi engzat nge i hman tawh le.
Kumin hian eng MASI nge i hman dawn.

Page-3

Hriattirna :

  
NATNA DENGUE LEH P.F. LAKA INVENNA
1.    Gengue natna hi phai lama mi tam takin an thihpui a ni a, heng laia kan thosi hmuh ho ang a\anga an kai a ni. Phai lama awm Mizo te pawhin an rawn kai tawh bawk.
    A lanchhuah dan :-
a) Khawsik sang tak awm thut. (b) Chal bawr nâ. (c) Mitmu chhung nâ, men nuam lo. (d) Thil ei tui lo. (e)Tihrawl leh ruh nâ. (f) Luakchhuak leh sentut anga bawk.
2.    Malaria P.F. pawh hi englai pawhin a awm reng tih i hria ang u.
3.    Thosilen zar vek tur.
4.    Tui zem chhinphui vek nise.
5.    A chunga tarlan bakah hritlang khawsik reng reng Sub-Centre/Clinic ah a rang lama thisen Exam turin kan inngen a ni e.
    Sd/- R.Lalthanliana
    H/W (M)

I DIM ANG U
    Mualzawl sira Hlimen Kum 200 tlinna hriatrengna lungphun (Monument) chu peih fel ani ta a. Veng rohlu tling a nih avangin mitinin i dimdawi  in, veng hmellanna pawimawh tak pakhat a ni tih i hria ang u.

PPP MODE
    Kartin bawlhhlawh vawi 2, Nilaini leh Inrinni zing apiangin 407 hmanga bawlhhlawh khawn a ni tawh dawn a. Karleh ni 12, Dec. 2012 (Nilaini) a\angin khawn \an tur a ni. Chhungtinte a hun leh hmunah bawlhhlawh paih \heuh turin kan inhriattir e.
    Tin, Pick-Up in bawlhhlawh a khawn chin erawh chu kar khatah vawi 1, Inrinni chauh a ni ang. Hei hi Public Contribution a\anga kan hmuh mila kan hire theih dan a ni a, mipuite hriatthiamna kan ngen a. Public Contribution kan hmuh \hat chhoh zel chuan Pick-Up pawh vawi hnih khawnkhawm tir tum a ni.
    Sd/- Secretary
    PPP Mode Commtt. Hlimen

SAVA VEH KHAP
    Kan kawmthlang huanah Sava veh \hin in awm a. Nangmahni pawh hriat thawi in ni a. Tun chinah sava in veh leh a nih chuan inchungah engpawh thleng se in sawibuai thei lovang.
    C.Lalhmingthanga, Kapdaia Sec.
 

 Lawrkhawm :

HLIMEN KUM 200 LUNGPHUN HAWNG DAWN
    Hlimen kum 200 hriatrengna lungphun(Monument) chu Dec. ni 14, 2012 ( Zirtawpni) zing dar 7:00 ah hawnna Lungphunna hmun; Mualzawl sirah neih a ni dawn a, hetah hian a thei apiangte \awiawm turin Celebration Comtt. chuan kan sawm che u.
    Hetiang hi hun hman dan tur a ni ang:
    1.    Hruaitu    :    Pu Vanlaltluanga
    2.    Hunserh    :    Pu Kawlthangpuia CSM
    3.    Hawngtu    :    Pu K. Liantlinga
    4.    Report & Thusawi    :    Upa Rinngaia
Tin, hetiang hi a\ul ang lo buaipui tura ngen te an ni.
    1.    |hutthleng rem    :    Buala Section.
    2.    Sound    :     Tv. R. Lalrindika & Tv.                     Pachhunga
    3.    Refreshment    :    Tv. R. Lalrindika & Br. YMA                     Commtt. hmeichhiate
    Sd/- Secretary, Bi-Centenary Celebration Comtt.

MIZORAM CHANCHINTHA THLEN NI
    Dec. ni 7. 2012(Zirtawpni) a Synod Rorel chuan Mizorama Chanchin\ha thlen hmasak ber ni diktak chu January ni 11, 1894 nilovin Mar. ni 15. 1891 a ni tih a pawm.  Hemi ni hian Rev. William Williams an kutbul lui chhuah, tlawng kam khua, Mualvumah chanchin\ha alo puang tawh a ni an ti a ni.

KAPDAIA SECTION HRIATTIRNA
    Quarry leh a chheh vela leivung leh bawlhhlawh zan lam mi reh laia rawn paih \hin hi vengchhung Motor ni a hriat a ni a. Vengchhung tan thil hnawksak a ni tih hria a rawn paih tawh lo turin kan ngen a che.
Sd/- Secretary
Kapdaia Section YMA

POULTRY FARMER ASSN. HRUAITU
    President    :    Pu Laltlankima, (SCS)
    Vice President    :    Pu Lalliankima, (KD)
    Secretary    :    Pu Lalchhantluanga, (KD)
    Asst.Secretary    :    Pu Zodingliana, (SCS)
    Treasurer    :    Pu Lalroliana, (KD)
    Fin. Secretary    :    Tv. Rony Lalbiaksanga (KD)
    Member fee la pe lo ten a rang lamin hruaitute hnenah pek tur a ni e.

Page-4

Keimahni :

hlimkhawpui budget
    Hlimkhawpui November thla Budget  pe tla tawhte:
1.    Buala Sec.    2. Kapdaia Sec.
3.    Vawmphunga    4. Damvea Sec.
5.    Lalsavunga Sec.
    Vawmphunga Sec.  Buala Sec. ten December thla Budget an pe tla tawh bawk.

faina chung chang
    Mizo tena kan hunpui ber Krismas kan lo thleng leh dawn ta reng mai a. Keini Saichhuma Sec. YMA te chuan chhungtinte mahni In leh a velte fai taka vawng turin kan inngen a. Venglai vela veivakte pawhin kawngpui leh a velte min vawnfaisak a bawlhhlawh a bawmah chauh paih \hin turin kan inngen bawk a ni. Tin, bazar nu hote pawhin mahni thil zawrhna hnawkte fai taka min thensak leh turin kan inngenin kan inhriattir nghal bawk a ni e.
    Sd/- Secretary
    Saichhuma Section

Branch Comtt. hnatlang
    Dec. ni 14. 2012(Zirtawpni) chhun dar 12:00 hian YMA Hall-ah Branch Comtt. Memberte zan lama inthlanna turah a\ul ang thawk a hnatlang neih tur a ni e.

THLANMUAL IN PEIH FEL TA
    Pu Lalhmingliana MP (Rajya Sabha) Fund a\anga thlanmual In sakna hmuh chu Thlanmual-I ah he tha hi thawh zawh a ni ta.
    Chhiat tawk an awm chang pawhin he Inah hian thlanlai thingpui lum \hin a ni tawh dawn a. Section lam ten thlanlai thingpui pek ngai tawh lovin thlanlai tura thawkchhuak \henkhat ten an inlum chawp tawh mai dawn a ni. He In sakna petu chungah hian Branch YMA hruaitu te an lawm hle. Hemi ah hian thlanmual incharge ten kan mawh a ni tih kan hriatthar a pawimawh awm e.

Chhiartute ngaihdan :

@@   Khawtlang hruaituten khawtlang thianghlimnana atan Rankhuahkhirh a puanga, Ui chhuak te pawh vawi duailo man a ni tawh in, a neitute pawhin an tlân tawh laiin khawlai leh hmun kilkhawr ah te Âr tla hmuh tur ava la tam em. Ran khuahkhirhna dan hian a huam ve lo nge, man sak ve tho tur ni ang aw? An \awpin an hnawksak ve tho si a.
-KT. Thianghlim duhtu.

@@   Veng kiltawp lama insatu khan vantlang kawng i tih chhiat kha engtikah nge i siam leh dawn nge siam leh i tum lo? Vantlang kawnga kalten mak an ti hle che a nia.
-Kawng\ha duha

@@   Tunlai hian kan veng chhungah pawh hmeichhia leh hmeichhia inngaizawnna hri\halo tak aleng mek a, vengdang a\ang pawhin hetiang tihchingte pawh an rawn huangtau sawt hle mai a; a darh zel loh nan i \angtlang teh ang u.
    Pathian huatzawng tak a ni si a.
-N. Zonunmawia.

Chawhchawrawi :

lalsavunga tû - Tûchhuan hlimenah
    Hlimen khaw hming phuahtu Lal hmasa ber Mizo Lal ropui Lalsavunga thlah kal zel, an chhungkaw ro khawmtu Pu Lalrengpuia Sailo chu Nov. ni 28, 2012(Nilaini) zingkarah a lo leng a, Chanmari veng a\angin. Hlimen khua Bi-Centenary tlin lawmna tur thu a lo leng phei a ni. A pu ‘Lalsavunga’ khawhlui a nih avanga atlangnel rukna leh a lo intih neitu ve thu ta a sawi a ni. Pi Matluangi(L) tihdam rawngbawlna pana an lo kal \umin, a kalpuite hnenah, ‘Hlimen hi ka pu khaw hlui a ni.’ tiin, inti khua takin a lo sawi a ni. An chhungkaw inthlahchhawn dan hetiangin :-  1). Lalsavunga fapa 2). vanhnuailiana fapa 3). Do\hiauva fapa 4). Kai\hianga fapa 5.) Lalrengpui Sailo a ni. Hlimen a an lo awm laia an lo neih tawh “ Sial Lam Dâr” an chhungkaw rohlu tak mai chu a la kawl \ha a. Pu Lalrengpuia Sailo hian Hlimen khua kum 200 tlin Monument hawnni Dec. 14, 2012 (Zirtawpni) zingkarah he “Sial Lam Dâr”  hi an rawn keng phei leh in an tum thei dawn ani. Pu Lalrengpuia Sailo hnen a\ang hian an chhungkaw thu in rochhiah, Hlimen - Aizawl hmanlai chanchin pawh thil tamtak a hriat belh theih. A lawmawm in a bengvar thlak hle a ni.
- By Rinngaia Colney